പ്രണയത്തിന്റെ ഭാഷ

ഹൃദയത്തിന്റെ സിരാതന്തുക്കളില്‍ നിന്നും 

വേട്ടയാടിപ്പിടിച്ച സ്വപ്നങ്ങളെ

മാത്രമേ നീ കണ്ടിരുന്നുള്ളൂ.

മിഥ്യയാം മനസ്സിന്റെ മൂടുപടമിട്ട

പ്രണയത്തിന്റെ ദിവ്യതയെക്കുറിച്ചേ 

നീ സംസാരിച്ചിട്ടുള്ളൂ.

പ്രണയത്തെ കാട്ടിലുപേക്ഷിച്ച

ശ്രീരാമനോടൊപ്പമായിരുന്നു നീ എന്നും.

ഹൃദയംകൊണ്ടും, മനസ്സുകൊണ്ടും

നീ എന്നെ ഉഴിയാന്‍ ശ്രമിച്ചപ്പോള്‍

ഒഴിഞ്ഞുമാറിയത് വെറുതെയല്ല.

ശരീരം കൊണ്ട് നിന്നെ അളക്കാന്‍

ശ്രമിച്ചപ്പോള്‍കിട്ടിയ കണക്കിലെ

പിഴവുകളില്‍ മനംനൊന്താണ്.

പ്രണയത്തെ എനിക്ക് തൊട്ടറിയാനേ അറിയൂ

ദൂരെമാറിനിന്ന്  നീ പ്രണയത്തെപ്പറ്റി പറഞ്ഞാല്‍ 

ഞാന്‍ എങ്ങനെ കേള്‍ക്കാനാണ്‌.